PAG-RESCUE SA SUGATANG NAVY SA AYUNGIN SHOAL, NAGING PAHIRAPAN

Inabot na ng halos hatinggabi ang pag-rescue sa sugatang miyembro ng Philippine Navy matapos ang marahas na pagharang at pagbabanta ng China Coast Guard (CCG) sa mga tropang magdadala ng suplay sa BRP Sierra Madre sa Ayungin Shoal noong Hunyo 17.

Sa ulat, nasugatan sa insidente ang 5 sundalo kung saan isa sa kanila ay naputulan ng hinlalaki na kinilala kay Seaman First Class Jeffrey Facundo.

Sa kabila ng walang-humpay na pagsunod ng CCG ay tuloy pa rin ang pag-rescue na inabot pa ng hatinggabi nang makabalik ang rigid hull inflatable boat (RHIB) ng PCG mula Ayungin Shoal sa BRP Cabra upang mabigyan ng paunang-lunas ang mga sugatang sundalo.

Dahil dito, mariing kinondena ng AFP ang marahas na insidente at iginiit nito na dapat ibalik ng China ang mga inagaw na mga armas at kagamitan ng Philippine Navy gayundin na bayaran ang danyos dulot ng insidente.