2 INFLUENCERS, POSIBLENG MA-BAN SA CORON MATAPOS SUMUGOD SA MAYOR’S OFFICE DAHIL SA ISANG FB COMMENT

Posibleng ideklara na persona non grata sa Coron, Palawan sina Rosemarie Tan o mas kilala bilang Rosmar at Rendon Labrador matapos sumugod sa opisina ng alkalde nitong Linggo.

Sa isang ulat, sumugod sa tanggapan ni Coron Mayor Marjo Reyes ang dalawang influencers upang ipaabot ang reklamo ukol sa komento na kanilang natanggap mula kay Jho Cayabyab Trinidad, isa sa mga staff ni Reyes, matapos mag-organize ng isang event para tulungan ang mga tao roon at mai-promote ang turismo ng Coron.

Sa kumakalat na video sa social media, hinarap nina Tan at Labrador si Trinidad na inakusahan ang dalawa ng panggagamit at pananamantala sa mga taga-Coron para sa kanilang vlog.

Nakalagay pa sa komento ni Trinidad na dismayado ito dahil sa paghihintay ng halos isang oras na gutom at wala pang natanggap na grasya mula sa mga ito.

Dahil dito, umalma si Tan at sumugod sa tanggapan ng alkalde ng Coron kasama si Rendon Labrador.

Paliwanag ni Rosmar na nagtungo umano ito ng Coron, Palawan upang magbakasyon at magsagawa ng charity event ngunit hindi nito inaasahan ang pagsalubong ng madaming tao pati na ang pag-rant ng babaeng staff dahil lang sa napurnadang ayuda.

Habang, sa pagdepensa naman ni Rendon na pumunta lamang ito ng Coron, Palawan para tumulong at i-promote ang lugar.

Sa kabila nito, agad namang ipinaabot ni Trinidad ang kaniyang public apology lalo na kina Rosmar at sa Team Malakas ukol sa kaniyang naging komento.

Ngunit, nag-post pa din sa social media ang vlogger na si Rosmar na “never again Coron, Palawan” kung saan maraming mga netizens ang nagalit na tila bakit anila nadamay ang buong munisipalidad sa kasalanan ng isang tao.

Kung kaya’t naghain ng resolusyon ang pamunuan ng Coron ukol sa pagdedeklara ng persona non grata sa dalawang vloggers.