ULO NG TAONG MAY SAKIT, PWEDE NANG ILIPAT SA IBANG KATAWAN?

 

‘Yan ang konseptong ipinakita ng isang kumpanya na nakabase sa Dubai.

Pero maniniwala ka ba ka-K5 na ang gagawa nito ay ang mga Robot?!

Sa kauna-unahang pagkakataon, inanunsyo ni Hashem Al-Ghaili, isang biotechnologist at science communicator na nakabase sa Dubai, ang kaniyang Brainbridge, na isang teknolohiya para sa head transplant.

Kung saan, layunin nitong pagsama-samahin ang advanced na robotics at artificial intelligence (AI) upang maisagawa ang kumpletong pamamaraan ng paglipat ng ulo at mukha.

Sa ganitong pamamaraan, nag-aalok ito ng panibagong pag-asa sa mga pasyenteng nagdurusa mula sa sakit na walang lunas tulad ng stage-4 cancer, paralysis, at neurodegenerative diseases gaya ng Alzheimer’s at Parkinson’s.

Ang posibleng maging donor ng naturang teknolohiya ay ang mga pasyenteng brain dead kung saan ang kanilang katawan ay puwede umanong ibigay sa mga taong nasa kritikal ang kondisyon.

Gagamit sila ng artificial plasma solution upang matiyak ang oxygen supply ng katawan habang isinasagawa ang transplant.

Ang katawan ng donor at ng recipient ay parehong palalamigin sa tinatayang na 5°C upang mabawasan ang posibleng brain damage sa kasagsagan ng pagputol ng ulo.

Magkakaroon din ng malaking papel sa operasyon ang paggamit ng integrated robotics platform na binubuo ng dalawang autonomous surgical robots na dinisenyo para gawin ang mga surgery ng magkasabay sa dalawang katawan mula sa iisang setup.

Giit pa ni Al-Ghaili na ang kanilang konsepto ay nakabatay sa mga lehitimong scientific research.

Aniya pa, posible nang magawa ang head transplant sa loob ng 8-taon.