TEENAGER, MAGIGING SANTO?

 

Dahil sa himalang iniuugnay sa isang teenager na si Carlo Acutis, binigyan siya ng pagkilala ni Pope Francis at itinuring na kauna-unahang ‘millenial saint’.

Ngunit, sino nga ba si Carlo Acutis at ano nga ba ang himalang ginawa nito?

Sa ulat ng Vatican News at Catholic News Agency, si Acutis ay ipinanganak noong Mayo 3, 1991 sa London, England.

Sa edad na 7-anyos, matapos ang unang Communion ni Acutis ay ibinahagi nito sa kaniyang ina ang plano sa buhay: “To always be united to Jesus”.

Mula noon, palagi nang dumadalo si Acutis sa daily Mass ng kanilang simbahan malapit sa kaniyang eskwelahan sa elementarya sa Milan.

Para kay Acutis, ang Eukaristiya ang kaniyang daan papuntang langit.

Dahil sa kabanalan at matinding pananampalataya, naging inspirasyon siya sa kaniyang magulang kung saan nakumbinsi nito sila na muling ilapit ang sarili sa Diyos maging ang kaniyang mga kaklase at kaibigan.

Sa edad na 15-anyos ay pumanaw ang binata noong Oktubre 12, 2006 sa Monza, Italy dahil sa sakit na leukemia.

Noong 2020 ay personal na binasbasan ni Pope Francis sa Assisi si Acutis kung saan ginawan din siya ng pilgrimage.

Samantala, paano nga ba nangyari ang himalang iniuugnay sa binata?

Sa bansang Costa Rica, isang 21-anyos na si Valeria Valverde ang naaksidente at nagkaroon ng matinding trauma sa ulo dahilan na ito’y sumailalim sa craniotomy surgery. Ayon sa mga doktor ay mababa anila ang tsansang maka-survive ito.

Sa pangyayaring ito, napagdesisyunan ng ina ni Valeria na manalangin sa libingan ni Acutis sa Assisi tsaka nag-iwan ng liham na nagsasaad ng hiling sa paggaling ng anak nito.

Noong araw ding iyon, ayon sa Vatican, biglang ipinaalam ng ospital kay Liliana na kusang huminga si Valeria. Kinabukasan, nagsimula na siyang gumalaw at bahagyang nakabawi sa pagsasalita.

Makalipas ang ilang mga araw, noong Hulyo 18, napatunayan ng CAT scan na nawala ang pagdurugo ni Valeria. Inilipat naman siya sa rehabilitation therapy noong Agosto 11, at mabilis siyang naka-recover.

Samantala, nitong Huwebes ay kinilala ni Pope Francis ang nangyaring himala. Dahil dito, iaanunsyo raw ng Vatican kung kailan ang magiging petsa ng canonization ni Acutis, kung saan magiging ganap na siyang isa sa mga santo ng Simbahang Katolika.