HIGIT 2K KATAO, PINANINIWALAANG NAILIBING NG BUHAY SA LANDSLIDE SA PAPUA NEW GUINEA

 

Pormal na nananawagan ng tulong sa internasyunal ang pamahalaan ng Papua New Guinea matapos na mahigit 2,000 katao ang pinaniniwalaang nailibing ng buhay sa landslide nitong Biyernes.

Ayon kay Luseta Laso Mana, acting director ng National Disaster Center ng naturang bansa, isang ‘major destruction’ ang nangyaring landslide sa Yambali village sa probinsya ng Enga.

Kung saan, nasira ang ilang mga gusali, mga taniman at nagdulot ng malaking epekto sa economic lifeline ng nasabing bansa.

Bagama’t hindi pa matiyak ang wastong bilang ng mga biktima sa landslide, nananatiling tinatayang na 670 katao ang namatay ang inilabas na report ng International Organization for Migration dahil sa kakulangan ng ebidensya gayundin, ang kawalan sa reliable census data ng national government.

Samantala, sa pagtatantya ng gobyerno, nasa 10-milyon katao ang populasyon sa Papua New Guinea ngunit batay sa pag-aaral ng U.N. na ibinase sa datos ng satellite photographs ng mga bubong noong 2022 ay mas mataas sa 17-milyon.