FILIPINO SPED NA GURO, KINILALANG ‘EDUCATOR OF THE YEAR’ SA ALASKA

 

Muling nakatanggap ng pagkilala ang Pinoy na Special Education (SPED) Teacher na si Dale Aller Ebcas sa Alaska bilang “Educator of the Year 2024”.

Si Ebcas ay tubong Cagayan de Oro City at kasalukuyang nasa ikaapat na taon nang nagtuturo sa Alaska kung saan umani ito ng pagkilala dahil sa kaniyang dedikasyon sa pagtuturo lalo na sa mga special kids.

Gayundin, siya ang itinalagang School District's Unified Sports Coordinator at Coach para sa mga sports na basketball, bowling, at badminton sa isang paaralan sa Alaska.

Dahil sa ipinakitang husay, personal na binati ng State of Alaska Department of Education Commissioner Deenah Bishop si Ebcas para sa kaniyang dedikasyon sa pagtuturo sa mga estudyante ng Gregory Elementary School sa Kalskag Kuspuk School District sa Alaska, USA.

Samantala, nauna nang pinarangalan ang naturang SPED teacher ng “Individual of the Year Award para sa Special Education in Inclusive Practices mula sa Governor’s Council on Disabilities and Special Education sa Alaska.