BUWIS-BUHAY! MGA TURISTA, NA-STRANDED SA BANGIN

 

Hanggang kailan ang itatagal mo para kumapit?

Nakakatakot at tila nakaka-trauma ang naging karanasan ng mga turistang ito na buong tapang na inakyat ang Yandang Mountain sa Eastern China.

At ang nakakahindik ay ang ma-stranded sa bangin na tanging lubid lamang ang kakapitan ng mahigit isang oras.

Nag-viral ang mga larawan ng climbers sa Chinese social media kung saan makikitang nakakapit sa gilid ng bangin ang mga ito habang hinihintay ang pag-usad ng ibang kasama sa kahabaan ng via ferrata – mga metal na baitang na naka-secure sa bundok.

“This is frightening! Someone like me afraid of heights might just wet myself up there!” komento ng isang Chinese netizen.

Ayon sa Wenzhou Dingcheng Sports Development Co., Ltd, namamahala ng via ferrata, inamin nilang hindi nila nakontrol ang dami ng tao na pumunta sa naturang bundok dahilan na nangyari ang insidente.

Dagdag pa ng kumpanya, pansamantala muna nilang itinigil ang pagbebenta ng ticket habang inaayos pa ang sitwasyon at nakatakda din silang maglulunsad ng isang traffic-control system para sa mga bisitang nais pumunta sa lugar.

Ang Yandang Mountain sa China ay itinuturing na sikat na lugar para sa mga Chinese tuwing holiday at isinumite din ito para sa UNESCO World Heritage site designation noong 2001 at nananatiling paring nakabinbin.