BYAHE AT TRABAHO SA TIMOG NA BAHAGI NG TAIWAN, BALIK NORMAL NA MATAPOS YANIGIN NG LINDOL

 

Balik normal na ang byahe at trabaho sa Timog na bahagi ng Taiwan matapos ang pagyanig ng magnitude 7.2 na lindol kahapon sa hilagang parte nito.

Ito ang sinabi ni Mr. Marjun Regalado, OFW sa nasabing bansa, sa panayam ng K5 News Team, kaugnay sa kanilang kasalukuyang sitwasyon matapos ang lindol.

Aniya bagama’t hindi direktang tumama sa kanilang lugar ang lindol ay ramdam pa rin nito ang pagyanig na mayroong 5 minutong pagitan at maituturing aniyang pinakamalakas na kaniyang naranasan sa loob ng halos 7 taon na pagtatrabaho sa bansa.

Sa kabila naman aniya ng kaniyang takot at pangamba na naramdaman ay tila normal lang sa ibang mga Taiwanese ang kaparehong sitwasyon kung saan mapapansin din aniya ang kahandaan ng mga ito sa pagsapit ng lindol sa tulong na rin ng makabagong teknolohiya.

Samantala, ipinasiguro naman nito na maayos na ang kanilang kalagayan at mapalad naman na walang mga kababayang naiulat na nadamay at wala ring gaanong kasiraan ang naitala partikular na sa kanilang lugar.