AMA, GINAWAN NG ATAUL ANG 2 ANAK NA NALUNOD

Photo Courtesy: Damag Ilocano

Mismong ang padre de pamilya na lang ang gumawa ng ataul na paglalagyan ng kaniyang dalawang anak na hindi nakaligtas matapos na malunod sa irigasyon sa Brgy. Naguiddayan, Bantay, Ilocos Norte.

Ito’y dahil sa kawalan ng pambili ng ataul at ang tanging ikinabubuhay nito ay ang pagsasaka.

Sa isang ulat, sinabi ni Frederico Pido, ama ng dalawang bata, na hindi nila pinapayagang maligo sa irigasyon ang kanilang mga anak ngunit sa pagkakataong iyon ay hindi nila namalayan ang pag-alis ng kanilang mga anak at pagpunta ng mga ito sa irigasyon.

Bago mangyari ang insidente, may nakakita pa sa dalawang bata malapit sa irigasyon at sinabihan pang umuwi na ang mga ito.

Ngunit, may posibilidad na patagong bumalik ang mga ito sa patubigan.

Napag-alamang lampas-tao ang naturang irigasyon kung kaya’t mariing pinagbabawalan ni Pido ang mga anak na lumapit dito.

Unang narekober ang katawan ng pitong-taong-gulang sa bahagi ng kanal sa kalapit na Brgy. Bulag East habang nakita ang katawan ng limang-taong-gulang sa Brgy. Malingeb.