2 PINOY, NASAWI SA MISSILE ATTACK NG HOUTHI

 

Patay ang dalawang seaman na sakay ng barko na dumadaan sa Gulf of Aden matapos ang ginawang missile attack ng isang rebeldeng grupo na Houthi.

Ayon sa Department of Migrant Workers (DMW), maliban sa nasawing dalawang seaman, dalawa pang Pinoy na tripulante ang malubhang nasugatan sa nangyaring pag-atake sa tinatayang 50-nautical miles ng baybayin ng Yemen’s port ng Aden.

Kaugnay nito, nangako naman ang ahensya na magbibigay sila ng buong suporta sa pamilyang naiwan ng mga biktima alinsunod sa direktiba ng Pangulong Ferdinand “Bongbong” Marcos, Jr.

Pahayag naman ng Reuters na mayroong 20 tripulanteng sakay ang naturang barko at tatlong armadong guwardiya kabilang na ang 15 Pinoy, apat na Vietnamese, dalawang Sri lankans, isang Indian at isang Nepali national.

Samantala, nagpadala na ng grupo ang DFA sa Yemen upang maghatid ng tulong sa mga apektadong mandaragat sa gitna ng nagpapatuloy na negosasyon.