PELIKULANG TAMPOK ANG MGA ACTORS SA WESTERN VISAYAS, MAIPAPALABAS NA SA JAPAN

Magkakaroon na ng sariling premier ang pelikulang “The Gospel of the Beast” sa gaganaping 36^th Tokyo Film Festival sa Japan.

Tampok sa naturang pelikula ang mga aktors mula sa iba’t ibang probinsya ng Western Visayas gayundin, ang kabuuang senaryo nito ay kinunan sa iba’t ibang lugar sa Panay partikular na sa Pandan, Antique at Iloilo.

Ayon sa Southern Lantern Studios, ilan sa mga kasamang gaganap ang mga kilalang award-winning actors na sina Jansen Magpusao ng Pandan, Antique, at Ronnie Lazaro ng Sagay, Negros Occidental.

Ang pelikulang “The Gospel of the Beast” ay nakatuon sa kwento ng isang 15-anyos na aksidenteng pinatay ang kaklase. Ito ay tumakas kasama ang lalaking hindi niya gaano kakilala, kung saan nakabuo ito ng kakaibang father-son relationship. Dito na natuklasan ng 15-anyos ang mapait na katotohanan tungkol sa buhay, kamatayan at BEASTHOOD.

Isa sa mga comeback film ni Sheron Dayoc ang nasabing pelikula matapos ang anim na taon.

Samantala, kabilang din sa recipient ng Film Development Council of the Philippines’ International Co-Production Fund ang pelikulang “Gospel of the Beast” at ang producer nito ay ang Southern Lantern Studios.