DATA LEAKS SA GOV’T AGENCIES, IKINADISMAYA NG PANGULONG MARCOS JR.

 

Inatasan ng Pangulong Ferdinand Marcos Jr. ang mga apektadong ahensya na maging “proactive” at palakasin pa ang depensa ng mga ito laban sa atake ng mga hackers.

Ito’y matapos na magkaroon ng data leaks ang iba’t-ibang ahensya ng pamahalaan.

Ayon sa Pangulo, nais nitong malaman ang technical details at pinaalalahanan na dapat na maging handa na ang mga ito bago pa man mangyari ang data leaks.

Nauna ng inulat ng Philippine Health Insurance Corp. (PhilHealth) na apektado ng cyber-attack ang kanilang website dahilan sa pag leak ng ilan sa mga datos nito.

Sinundan naman ito ng kaparehong isyu sa Philippine Statistics Authority (PSA), Department of Science and Technology (DOST), at Philippine National Police (PNP).

Ibinunyag naman ni DICT spokesperson Renato Paraiso na tukoy na ang suspek sa likod ng insidente ng data breach sa PSA.

Samantala, hindi pa pinangalanan ang sangkot sa likod ng mga nangyaring hacking sa system ng ilang ahensya ng gobyerno ngunit tiniyak ng pamahalaan na iisang tao lang umano ang salarin sa naglabas at nagpakalat ng mga datos sa PSA at DOST. 

| VILROSE CUAL