"TRABAHO PARA SA BAYAN BILL", BATAS NA

Opisyal nang naging batas ang Republic Act No. 11962 o ang “Trabaho Para sa Bayan Act” matapos itong lagdaan ni Pangulong Ferdinand Marcos Jr. nitong Miyerkules, Setyembre 27.

Layunin ng naturang batas na makabuo ng mga trabaho at oportunidad para sa mga Pilipino gayundin solusyon ito sa mga isyu hinggil sa labor market sa bansa.

Nagpaabot naman ng pasasalamat si Senate Majority Leader Joel Villanueva na tinugunan ng pangulo na maisabatas ang “Trabaho Para sa Bayan Act” upang mabawasan ang mga Pilipinong walang trabaho.

Umaasa pa si Villanueva na mabigyan ng sapat na pondo ang nasabing batas nang sa gayon ay maramdaman ng mga Pilipino ang benepisyong dulot nito.

Samantala, sinabi ni Pangulong Marcos na makatutulong ang bagong batas upang maresolba ang isyu sa labor sector.