OPTION NG HALF-RICE SA MGA FOOD ESTABLISHMENT, PAYAG KA BA?

 

Nagpatupad ng mandatoryong half-rice option sa mga food establishment ang lungsod ng Cebu bilang bahagi sa inisyung ordinansa ng city government.

Nakasaad sa City Ordinance No. 2409 o ang Rice Conservation Ordinance of Cebu City ang pag-promote ng rice conservation sa mga paaralan at establisyemento dahil sa nagtataasang presyo ng mga bilihin.

Ipinahayag ni Councilor Mary Ann delos Santos na layunin ng nasabing ordinansa na maiwasan ang pagsasayang ng kanin sa lugar at maturuan ang publiko na magtipid ng bigas.

Iniutos din ng konseho sa City Health Office na magsagawa ng inspeksyon sa mga food establishment para masiguro na ito’y sumusunod sa nasabing ordinansa.

Kaugnay nito, may kaakibat namang penalidad ang sinumang hindi sumunod sa nasabing ordinansa kung saan papatawan ng P1,500 administrative fine para sa first offense, P3,000 at P4,000 naman para sa pangalawa pangatlong magkasunod na paglabag.

Habang, mahaharap naman sa posibleng suspensyon ng business permit at multang P5,000 ang establisyementong lumabag sa ikaapat na beses. |SAM ZAULDA