MGA NAGING BAHAGI SA PAKIKILAHOK NG KALIBO SA PH TRAVEL MART 2023, BIBIGYANG PAGKILALA

Bibigyan ng pagkilala ng lokal na pamahalaan ng Kalibo ang lahat na naging bahagi sa pakikilahok ng Kalibo sa kakatapos lamang na 34th Philippine Travel Mart ngayong taon.

Ito ay matapos na naiuwi ng Kalibo ang parangal bilang Best Booth mula sa 200 exhibitors sa 17 rehiyon sa bansa na nakilahok sa naturang aktibidad.

Matandaang itinampok ng Kalibo ang Ati-atihan, Piña weaving at mga lokal na produkto ng Aklan.

Ayon kay Sangguniang Bayan (SB) Member Phillip Yerro Kimpo Jr., sa unang pagkakataon ay nakuha ng Kalibo ang nasabing parangal kung saan pinaghandaan ito ng mga lokal na opisyal ng gobyerno.

Aniya, ito rin ang tamang panahon para paglaanan ng pondo ang turismo.

Dagdag pa nito, malaking karangalan na nag-perform ang Ati-atihan sa Philippine Travel Mart dahil nagpapakita lamang ito na ang Kalibo ang “Mother of All Philippine Festival.

Kaugnay nito, inihayag naman ni Kalibo Mayor Juris Sucro na mas pang palalakihin ang booth ng Kalibo sa susunod na taon. |JURRY LIE VICENTE