LTFRB, PINAG-AARALAN ANG POSIBILIDAD SA IKALAWANG YUGTO NG FUEL SUBSIDY

Pinag-aaralan ngayon ng Land Transportation Franchising and Regulatory Board (LTFRB) ang posibilidad ng ikalawang yugto ng fuel subsidy para sa mga PUV operators at drivers na apektado ng nagpapatuloy na oil price hike.

Inihayag ni LTFRB Chairman Teofilo Guadiz na posible ang nasabing plano sa oras na humaba pa ang panahon ng patuloy na oil price hike sa bansa.

Ramdam din aniya nito ang nararanasang epekto sa mga PUVs kung kaya’t bubusisiin nila ang pagkakaroon ng ikalawang round ng fuel subsidy sa mga operator at driver ng mga pampasaherong sasakyan.

Matatandaan na nito lamang linggo ay nagsimula ang LTFRB sa pamamahagi ng fuel subsidy sa mga PUVs kung saan may 1.36 milyon na operators at drivers ang benepisyaryo ng subsidiya.

Maliban naman sa fuel subsidy, pinag-aaralan din ng ahensya ang mga hirit sa taas pasahe ng transportation groups dahil na rin sa tuluy-tuloy pa ring pagsipa ng presyo ng produktong petrolyo.

Kabilang na rito anya ang provisional o pansamantalang taas pasahe sa jeep na malaki aniya ang posibilidad na maaprubahan.

Samantala sinabi naman ni Guadiz na nakatakda silang makipag-ugnayan sa National Economic and Development Authority sa pinal na halaga ng provisional hike at kung kailan ito dapat ipatupad. | TERESA IGUID