KAKAIBANG ONLINE SINGING CONTEST, KINAGILIWAN

 

KaBandera, sintunado ka ba? Magpasalamat ka dahil it’s your time to shine!

Isa kasing online singing contest ang inilunsad sa Kabankalan City, Negros Occidental sa pangunguna ni Vice Mayor Miguel Migz Zayco sa Facebook page nito.

Ngunit, ang naturang kumpetisyon ay hindi para sa mga mang-aawit kundi para sa mga sintunado.

Kung kaya’t maraming mga Pinoy ang natuwa at nabuhayan ng loob sa pagkakataong mayroon nang patimpalak para sa mga sintunado.

Sa isang ulat, ipinahayag ng bise-alkalde na nais nitong bigyan ng pagkakataon at lakas ng loob ang mga sintunadong itinatago ang kanilang boses sa bahay.

Ang “Search for Libagon Champion” ay umani ng libo-libong mga comments at shares ilang oras matapos itong i-post sa social media ni Zayco.

Ikinatuwa naman ito ng bise-alkalde na sa loob lamang ng tatlong araw ay umabot na sa 2.1 million ang reach nito, 63,000 reacts at mahigit 12,000 shares.

Mula sa mahigit 100 sintunado na sumali, isang 29-anyos at OFW sa Hong Kong na si Rona Gustilo ang nag-uwi ng kampyeonato sa naturang contest kung saan nakuha nito ang tropeo at premyong P5,000.00

Samantala, plano namang gawing nationwide ang contest na tatawaging “SINGtonado, ang boses ng bawat Pilipino na wala sa tono.”