BODY SHAMING, NAGDULOT NG TRAUMA SA ISANG KOLEHIYALA; KONDUKTOR, SINUSPINDE

Umani ng samu’t saring mga reaksyon sa netizans ang ibinahaging karanasan ng isang kolehiyala ukol sa pamamahiya sa kanya ng isang konduktor sa Bacolod City, Negros Occidental.

Sa kaniyang post, labis ang trauma na naramdaman ng isang 19-anyos na psychology student ng naturang lugar matapos nitong sumakay sa isang modern jeepney at singilin ng dobleng pamasahe ng isang konduktor dahil sa dalawang upuan umano ang sakop nito.

Sa isang ulat, sinabi ng estudyante na hindi naman aniya ikinakahiya ang kaniyang katawan na itinuturing na “plus size”.

Ngunit, labis itong naapektuhan sa pamamahiyang ginawa ng konduktor sa harap ng iba pang mga pasahero.

Dagdag pa na kwento ng 19-anyos na estudyante, sa halip na P11 ang ibabayad nitong pamasahe ay sinisingil ito ng konduktor ng P22 kung kaya’t nagdesisyon nalang itong bumaba.

Bagama’t nagawa pa itong ipagtanggol ng ibang pasahero, nagdesisyon na lamang itong bumaba.

Sa kabila nito, naglabas ng pahayag ang RSJ Lines, Inc. hinggil sa nangyari at humingi ng paumanhin sa ipinakitang asal ng konduktor na umano’y sinuspinde na.

Nag-public apology na din ang konduktor na namahiya sa isang kolehiyala at iginiit pa nito’y isang biro lamang umano niya iyon ngunit sa huli ay napagtanto nito ang kamaliang nagawa.

Samantala, gagpaalala naman ang lokal na pamahalaan sa mga operator na igalang ang kanilang mga pasahero. |SAM ZAULDA