ASSETS NI TEVES, IPINA-FREEZE KASUNOD NG PAGDEKLARA SA KANYA NG GOBYERNO NA TERORISTA

 

ASSETS NI TEVES, IPINA-FREEZE KASUNOD NG PAGDEKLARA SA KANYA NG GOBYERNO NA TERORISTA

Matapos ideklara ng gobyerno bilang isang terorista si suspended Negros Oriental Rep. Arnolfo Teves Jr., ipinag-utos din ng Anti-Money Laundering Council (AMLC) ang pag-freeze ng mga ari-arian nito.

Kasama sa inilabas na freeze order ang mga assets ng kapatid ni Teves na si dating Negros Oriental Governor Pryde Henry Teves, at 11 pang tinawag na mga terorista ng Anti-Terrorism Council.

Kabilang sa mga apektado nito ay ang mga pag-aari at kontroladong assets ng 13 kabilang sa listahan.

Nagbabala naman ang AMLC na ang sino mang mahuling nagbibigay ng tulong sa mga Teves at iba pang kasamahan ay maaring makasuhan sa ilalim ng anti-terrorism financing law.

Matatandaang nag-ugat ang pag-iimbestiga ng Anti-Terrorism Council, dahil sa pagpatay kay Governor Roel Degamo at iba pang kaguluhan na nangyayari sa Negros Oriental kung saan ang mga Teves umano ang may kagagawan. /Ni Rio Trayco