114 PAMILYANG KATUTUBO, LUMIKAS DAHIL SA PAG-ATAKE NG MGA TERORISTA

 

114 PAMILYANG KATUTUBO, LUMIKAS DAHIL SA PAG-ATAKE NG MGA TERORISTA

Ni John Ronald Guarin

 

Mahigit 100 na pamilyang Teduray na naninirahan sa boundary ng Talayan at South Upi sa Maguindanao del Sur ang lumikas sa mga ligtas na lugar matapos guluhin ng teroristang grupo na sinunog pa ang kanilang napakalumang dasalan at ilang mga bahay sa kapaligiran.

 

Ayon kay Brig. Gen. Allan Nobleza, director ng Police Regional Office-Bangsamoro Autonomous Region, binigyan ng bigas at iba pang mga relief supplies nitong Lunes ng Rapid Emergency Action on Disaster Incidence (READi) contingent, ang mga apektadong pamilya na pansamantalang nasa Barangay Biarong sa bayan ng South Upi.

 

Ang READi ay isang emergency response agency ng Bangsamoro Autonomous Region in Muslim Mindanao (BARMM) na nasa pamamahala ni Regional Local Government Minister Naguib Sinarimbo.

 

Ayon kay Army Major Gen. Alex Rillera, commander ng 6th ID, nagtutulungan na ang kanilang mga unit sa Maguindanao del Sur at PRO-BAR na kilalanin ang mga tero­ristang nanggulo sa mga Teduray upang sampahan ng mga kaukulang kaso.