LALAKI, KRITIKAL SA OSPITAL MATAPOS SAKSAKIN NG BASAG NA BOTELYA SA LEEG

 

LALAKI, KRITIKAL SA OSPITAL MATAPOS SAKSAKIN NG BASAG NA BOTELYA SA LEEG

Kritikal ang kondisyon ng isang lalaki matapos itong saksakin sa leeg ng binasag na botelya sa Sitio Dueunan Brgy. Ochando, New Washington.

Kinilala ang mga biktima na sina Mark Charnil Sioco, 30-anyos at kapatid nitong si Martil Sioco, 29 anyos habang ang suspek ay si Rhett Jasper Andrade 31-anyos at parehong residente ng nabanggit na lugar.

Batay sa New Washington PNP, nag-iinuman umano ang magkapatid na Sioco kasama ang suspek nang magkaroon sila ng hindi pagkakaintindihan.

Lumalabas sa imbestigasyon na naghamon ng away si Andrade hanggang sa kumuha ito ng dalawang botelya at binasag tsaka sinasaksak sa dalawang magkapatid.

Unang sinaksak ng suspek si Martil na tumama sa likurang bahagi ng leeg nito habang sugatan din ang kanyang kamay.

Pagkatapos, sunod nitong sinaksak ang nakakatandang kapatid na si Charnil na nagresulta ng matinding sugat sa leeg, gayundin sa braso, mukha at iba pang bahagi ng kanyang katawan.

Kaagad namang isinugod ang mga biktima sa ospital upang mabigyan ng atensyong medikal.

Samantala, mahaharap sa kasong frustrated murder ang suspek habang ito’y kasalukuyang naka-hospital arrest matapos umano itong mabugbog. /Ni Jurry Lie Vicente