TULUYANG PAG-AALIS NG SYSTEM LOSS CHARGE SA KURYENTE, MAAARING IKALUGI NG MGA ELECTRIC COOPERATIVE

 

Ikinabahala ng PHILRECA o Philippine Rural Electric Cooperatives Association ang posibleng negatibong dulot ng tuluyang pagtatanggal ng system loss charge sa kuryente.

Ayon sa PHILRECA, kung sakali kasing tuluyang tanggalin ang system loss charge ay may posibilidad na malulugi ang mga electric cooperative kung walang subsidiya mula sa pamahalaan.

Ang naturang pagkabahala ay naungkat nang mabanggit ito sa kamakailang SONA ng pangulo na panahon na upang itigil ang pagpapasa ng system loss sa mga konsumer dahil hindi naman nila kasalanan kung bakit nagkawala ng kuryente sa transmission at distribution system.

Gayunpaman, labis itong ikinabahala ng PHILRECA at sinabing bagama’t suportado nila ang panukala ng Pangulong Ferdinand Marcos Jr. na alisin ang VAT o value-added tax sa system loss charge, pero dapat anilang sagutin ng gobyerno ang naturang gastos kung tuluyang ipagbabawal ang paniningil nito sa mga consumer.

Binigyang-diin din ng PHILRECA na ang tuluyang pagbabawal sa system loss charge nang walang kapalit na pondo ay maaaring lumabag sa EPIRA o Electric Power Industry Reform Act.