MAG-AARAL NG DANAWAN ELEM. SCHOOL SA ANTIQUE, NANAWAGAN NG TULONG PARA SA TEMPORARY LEARNING SCHOOL

 

Nanawagan ng tulong at donasyon ang pamunuan ng paaralan at barangay para sa mga mag-aaral ng Danawan Elementary School matapos mapilitang magsagawa ng klase sa gymnasium ng Barangay Danawan sa unang araw ng pagbubukas ng klase.

Sa inilabas na post ng barangay, makikitang nagkaklase ang mga estudyante sa loob ng gymnasium kung saan direktang naaabot ng sikat ng araw ang kanilang lugar ng pag-aaral.

Dahil dito, humihingi ang barangay ng suporta upang mapondohan at matapos ang itinatayong Temporary Learning School para sa mga mag-aaral.

Sa panayam ng K5 News FM kay Eric Cortejo, Public Information Officer ng Department of Education Schools Division of Antique, sinabi niyang inirekomenda ng lokal na pamahalaan ang pansamantalang paglikas ng paaralan mula sa kasalukuyang lokasyon nito matapos matuklasang hindi na ligtas ang lugar at may mataas na panganib ng pagguho ng lupa o landslide.

Ayon pa kay Cortejo, nakitaan ng mga bitak o cracks ang mga silid-aralan kasunod ng lindol na naranasan noong Setyembre 30, 2025.

Dahil sa mga pinsalang ito at sa banta ng landslide, minabuting ilipat muna ang mga klase habang hinihintay ang mas ligtas at mas permanenteng pasilidad para sa mga mag-aaral.

Patuloy naman ang panawagan ng komunidad para sa anumang tulong na makatutulong sa pagtatayo ng pansamantalang paaralan at sa pagpapatuloy ng ligtas na edukasyon ng mga estudyante.