TAXI OPERATOR SA CEBU, INISYUHAN NG SHOW-CAUSE ORDER MATAPOS UMANO ANG PANLOLOKO SA K-POP STAR NA SI SOOBIN

 

Inisyuhan ng show-cause order ng Land Transportation Franchising and Regulatory Board (LTFRB) ang isang taxi operator matapos umano nitong tangkaing i-scam ang pasahero na si Soobin, isang K-pop idol, sa Cebu.

Sa viral na video na ibinahagi ni Soobin, isinalaysay nito ang naging karanasan sa pagsakay ng taxi mula sa Mactan-Cebu International Airport.

Ayon sa kanya, napagkasunduan ang pamasahe na ₱500, bagama’t sinabi niyang karaniwang nasa ₱300 lamang ang halaga ng naturang biyahe.

Gayunpaman, pagdating sa kanyang destinasyon, umano’y biglang itinaas ng driver ang singil sa ₱1,000. Agad itong tinutulan ng K-pop star at ini-report ang insidente.

Bilang tugon, inatasan ng LTFRB ang taxi operator na isumite ang plaka ng sasakyan at lisensya ng driver na sangkot sa insidente. Pinagsumite rin ang operator ng written explanation bilang bahagi ng due process.

Samantala, pansamantalang sinuspinde ng isang buwan ang nasabing taxi unit. Nakatakda naman ang pagdinig sa kaso sa Abril 21.

Patuloy namang pinaalalahanan ng LTFRB ang mga operator at driver na sumunod sa itinakdang pamasahe at umiwas sa anumang uri ng pananamantala sa mga pasahero.