LABI NG KAPATID, GINAWANG “PATUNAY” PARA SA BANK WITHDRAWAL

 

Isang kakaibang insidente sa silangang bahagi ng India ang naging viral kamakailan matapos kumalat sa social media ang larawan ng isang lalaki na buhat-buhat ang labi ng kaniyang kapatid patungo sa isang bangko.

 

Ayon sa mga ulat mula sa lokal na media, ang 52-anyos na lalaki ay umano’y napilitang hukayin ang mga labi ng kaniyang kapatid matapos siyang paulit-ulit na mabigong makuha ang perang naiwan nito sa bangko.

Ilang beses daw siyang nagtungo sa nasabing bangko upang mag-withdraw, ngunit hindi ito pinahintulutan dahil sa kakulangan ng opisyal na dokumento na magpapatunay sa pagkamatay ng kaniyang kapatid.

 

Dahil dito, nagpasya umano ang lalaki na dalhin ang labi ng kapatid bilang patunay, isang hakbang na ikinagulat ng mga empleyado at costumer ng bangko.

Agad namang kumalat ang larawan ng insidente online, na nagdulot ng matinding reaksiyon mula sa publiko.

 

Samantala, itinanggi ng pamunuan ng bangko ang paratang na pinahirapan nila ang lalaki. Sa kanilang pahayag, sinabi nilang sumusunod lamang sila sa umiiral na proseso at kinakailangan ang legal na dokumentasyon, tulad ng death certificate, bago pahintulutang ma-withdraw ang pera ng isang namatay na kliyente.

 

Patuloy namang pinag-uusapan ang insidente, na nagbukas ng diskusyon tungkol sa kahalagahan ng maayos na proseso sa mga institusyon at ang mga hamong kinahaharap ng mga ordinaryong mamamayan sa pagkuha ng serbisyong pinansyal.