SOCIAL MEDIA BAN PARA SA 16 TAONG GULANG PABABA, MULING ISINUSULONG SA PILIPINAS

 

 

Muling iginiit ni Senador Win Gatchalian ang pangangailangang magpatupad ng social media ban para sa mga menor de edad sa Pilipinas.

 

Ito ay matapos ipatupad ng Indonesia ang kaparehong polisiya para sa mga wala pang 16 taong gulang,

 

Sa ilalim ng naturang regulasyon, ipagbabawal para sa mga wala pang 16 taong gulang ang paggawa at paggamit ng account sa mga platforms na itinuturing na ‘high-risk,’ kabilang ang Instagram, Tiktok, Facebook, YouTube, X, Roblox, at iba pa.

 

Matatandaan na kamakailan lamang ay hinimok ng Cybercrime Investigation and Coordinating Center (CICC) ang mga telcos na maghanda para sa posibleng ban ng Roblox sa buong bansa upang protektahan ang mga bata mula sa pang-aabuso sa online platform at sa nakakapinsalang nilalaman ng naturang platform.

 

Binalikan din ng senador ang mga naging resulta ng 2022 Programme for International Student Assessment (PISA), kung saan lumalabas na sa bawat isang oras na dagdag sa paggamit ng digital devices ng mga 15-taong gulang na mga mag-aaral para sa paglilibang, bumaba ng apat na puntos ang kanilang mga marka sa math.

 

✍TERESA IGUID