TRADISYUNAL NA PAGTUTULI SA SOUTH AFRICA, KUMITIL NG 41 KABATAANG LALAKI

 

Humigit-kumulang 41 kabataang lalaki ang naiulat na namatay matapos sumailalim sa tradisyunal na circumcision sa South Africa mula Nobyembre hanggang Disyembre 2025.

 

Ayon sa mga ulat, ang mga insidente ay may kaugnayan sa initiation rites o ritwal ng pagpasok sa pagiging ganap na lalaki na isinasagawa taun-taon ng ilang etnikong grupo sa Africa, kabilang ang Xhosa, Ndebele, Sotho, at Venda.

 

Bilang bahagi ng ritwal, pansamantalang inihihiwalay ang mga kabataang lalaki sa kanilang komunidad at dinadala sa tinatawag na initiation schools, kung saan isinasagawa ang pagtutuli. Gayunman, sa paglipas ng mga taon ay naitala ang ilang pagkamatay na iniuugnay sa nasabing gawain.

 

Dahil dito, nagpatupad ang pamahalaan ng South Africa ng mga batas na nag-aatas sa rehistrasyon ng lahat ng initiation schools. Sa ilalim ng umiiral na batas, tanging ang mga kabataang lalaking may edad 16 pataas at may pahintulot ng magulang ang maaaring sumailalim sa naturang ritwal.

 

Samantala, sa Pilipinas, ang pagtutuli ay itinuturing ding hudyat ng pagbibinata at nananatiling isang tradisyong pinagdaraanan ng maraming kabataang lalaki.