DATING PERUVIAN PRESIDENT MARTIN VIZCARRA, KULONG NG 14-TAON DAHIL SA KORAPSYON

 

Hinatulan ng 14 na taon pagkakakulong si dating Peruvian President Martin Vizcarra matapos mapatunayang tumanggap ng suhol bago pa man maging pangulo.

 

Ayon sa naging hatol ng korte sa Peru, napatunayang tumanggap si Vizcarra ng humigit-kumulang $676,000 na suhol mula sa mga construction firm kapalit ng mga kontrata sa imprastraktura noong siya ay gobernador ng Moquegua mula 2011 hanggang 2014.

 

Mariin naman niyang itinanggi ang mga paratang at iginiit na siya ay biktima ng political persecution. Naging pangulo siya noong 2018 matapos magbitiw ang kanyang sinundan, ngunit napaalis din noong 2020 dahil sa mga imbestigasyon sa korapsyon.

Noong 2021, nanguna si Vizcarra sa mga nanalong congressional candidates ngunit pinagbawalan siyang humawak ng anumang posisyon sa loob ng 10 taon dahil sa paglusaw niya sa Kongreso noong 2019.

 

Patuloy ang political turmoil sa Peru, na nagkaroon na ng anim na presidente mula 2018 dahil sa sunod-sunod na impeachment at resignation na kadalasang may kinalaman sa korapsyon.

Napag-alaman na tatlo pang dating pangulo—Alejandro Toledo, Ollanta Humala, at Pedro Castillo—ang kasalukuyan ding nakakulong dahil sa iba’t ibang kaso.