“TOMBEK” CASE SA TURKEY: PALAYAW NA “CHUBBY,” NAUWI SA KASONG KRIMINAL LABAN SA MISTER

 

Nauwi sa kasuhan ang tila simpleng palayaw na “Tombek”, na ang ibig sabihin sa English ay “chubby,” matapos ireklamo ng isang Turkish woman ang kanyang asawa dahil umano sa pang-aalipusta.

 

Batay sa ulat, nadiskubre ng babae na naka-save sa cellphone ng kanyang asawa ang ibang pangalan imbes na ang tunay niyang pangalan. Lumabas na ang ginamit ng lalaki ay ang palayaw na “Tombek,” na itinuturing ng babae bilang isang nakaka-insultong bansag na nagpapababa sa kanyang pagkatao at nakaapekto sa kanilang relasyon bilang mag-asawa.

 

Hindi naman isiniwalat sa publiko ang pagkakakilanlan ng mag-asawa, ngunit napag-alaman na pinanigan ng korte ang babae. Inutusan ang lalaki na magbayad ng danyos sa kanyang asawa at inaprubahan din ang hiling na diborsyo.

 

Bukod dito, pinatawan ng parusang pagkakakulong ang lalaki, bagaman hindi tinukoy kung gaano katagal ang sentensiya.

 

Dahil sa naturang desisyon, itinuturing na ngayon sa Turkey na isang legal precedent ang kaso, na nagsisilbing babala sa mga kalalakihan na maging maingat sa pagbibigay ng mga palayaw sa kanilang mga asawa upang maiwasan ang katulad na insidente sa hinaharap.