"WANG-WANG VIP?" - VAN NA GUMAMIT NG SIRENA, VIRAL ANG KOMPRONTASYON

 

Nasita ang isang van matapos umano itong gumamit ng sirena o “wang-wang” sa Cavite.

Umani ito ng batikos mula sa netizens na kumondena sa umano’y pag-aabuso ng “VIP” road privileges.

Ayon sa TikTok account na Road Audit PH, ipinakita sa video ang isang Toyota Hiace Grandia na sinita ng isang galit na driver.

“Illegal wang-wang. VIP daw sakay. Toyota Hiace Grandia,” mababasa sa caption ng video. Hinihikayat din ng uploader ang mga viewer na tulungan silang makilala ang pasaherong bumaba mula sa van.

“Wang-wang pa, sige!” maririnig ang isang lalaki na sinisita ang van driver.

“Bakit ka nagwa-wang-wang, kuya? Pulis ka ba? Pulis ka?! Pulis ka nga?!” dagdag pa nito habang kinukompronta ang driver.

Maririnig din sa video ang babaeng kasama ng nagrereklamong driver na nagsasabing, “Bawal kasi ’yan eh.”

Maririnig naman na sinasabi ng van driver na nagmamadali siya. Nang tanungin kung pulis siya, sagot ng driver ay may “VIP” umano siyang sakay.

“VIP? Pakialam ko!” mariing sagot ng galit na driver.

Sa puntong iyon, bumaba ang isang babaeng pasahero mula sa van at kinuha ang kanyang cellphone, tila kinukunan ng litrato ang sasakyan ng nagrereklamong driver.

“Pulis kayo? Ba’t may wang-wang kayo? Ha?!” muling sigaw ng galit na driver.

Kung matatandaan, ipinagbawal na ni Pangulong Ferdinand Marcos Jr. ang mga opisyal ng gobyerno at mga personnel sa paggamit ng “wang-wang”, blinkers o anumang kaparehong signal o flashing devices.

Hindi naman kasama rito ang mga sasakyang ino-operate ng Armed Forces of the Philippines (AFP), ang National Bureau of Investigation, ang Philippine National Police, fire trucks, hospital ambulances at iba pang emergency vehicles.

Nabatid na nauna nang ipinahayag ng pangulo kaugnay rito na ang paggamit ng “wang-wang” at mga kaparehong devices ay nakakagambala sa kalsada na nagiging dahilan ng trapiko kung kaya’t nagdesisyon siyang ipagbawal ito.