ATE GAY, PATULOY NA KUMAKAPIT SA PAG-ASA SA KABILA NG STAGE 4 CANCER

 

Pansamantalang tumigil sa pagtatrabaho ang komedyanteng si Ate Gay dahil sa mabigat na hamon na kinakaharap niya sa kaniyang kalusugan.

Ayon sa ulat, na-diagnosed ang komedyante na may stage 4 cancer. Ang inakalang beke lang noon, sintomas na pala ng malubhang sakit.

Ibinahagi ni Ate Gay sa isang episode ng “Kapuso Mo, Jessica Soho” ang pinagdaanan niyang serye ng medical tests, kabilang ang ultrasound at CT scan na nauwi sa biopsy.

Kinailangan pa niyang kumuha ng second opinion matapos lumabas ang hindi magandang ng kaniyang mga tests.

“May show ako sa Canada, medyo lumalaki na siya. At saka nagbi-bleed nang nagbi-bleed,” sinabi ni Ate Gay. “Mahirap ngayon ang lagay ko. May kanser ako, stage 4 daw.”

Bagama’t umaasa si Ate Gay, sinabi raw ng mga doktor na hindi na siya maaaring maoperahan at tinaya pang hindi siya lalampas ng 2026.

“Wala raw lunas. Masakit sa akin. Halos araw-araw umiiyak ako. Hindi naman ako nagkulang kay Lord. Although lagi kong sinasabi na walang himala,” ani ni Ate Gay.

Sa kabila nito, patuloy pa ring nananalangin si Ate Gay para magkaroon ng lakas na loob at pag-asa na malampasan ang kaniyang pinagdaraanan.