ESTUDYANTE SA AKLAN, HINARAP ANG MATINDING HAMON PARA SA PAG-ABOT NG PANGARAP

 

Naantig ang mga netizens sa estudyanteng ito na hindi ininda ang pagod at hirap ng buhay para sa pag-abot ng mga pangarap.

Viral ang kwento ng isang estudyante mula sa Madalag, Aklan na kahit kapos at nahihirapan ay patuloy pa rin sa pagkamit ng minimithi nito sa buhay.

Ibinahagi ni Genevie Gregorio na inakyat nila ng kaniyang pamangkin ang isang bundok sa kanilang probinsya para makasagap ng signal at makakuha ng schedule sa scholarship exam sa pinapasukang unibersidad sa lugar.

Inabot na ng ilang oras ang kanilang paglalakad ay hindi pa din nila naabot ang lugar na kanilang inakyat sa bundok.

Ilang sandali pa, ramdam na ng pamangkin ni Genevie ang pagod at init dahilan na nawalan ito ng malay sa daan.

Makaraan ang ilang saglit na pagpapahinga nito ay muling nagkamalay ang estudyante at itinuloy pa din nito ang pag-akyat sa bundok sa halip na umuwi.

“Gusto niyang tulungan ang pamilya niya. Sobrang hirap kasi ng buhay dito sa amin, malayo sa bayan." ayon kay Genevie.

"Pagbubukid at pag-a-abaca lang ang hanapbuhay ng parents niya rito para makapag-aral sila.” dagdag niya.