BORACAY, MAGBUBUKAS NG PRIVATE BEACH PARA SA MGA BABAENG MUSLIM

Nakatakdang magbubukas ng isang pribadong beach ang Department of Tourism para sa mga babaeng Muslim sa Boracay Newcoast sa Setyembre 10.

Layunin ng naturang hakbang na mabigyan ng oportunidad ang mga turistang Muslim na nagnanais ng privacy habang nag-eenjoy sa paglalangoy.

Ayon kay DOT Undersecretary for Muslim Affairs Myra Paz Valderrosa-Abubakar, suhestyon aniya ito ng mga ambassador mula sa Malaysia at Brunei sa isang pagpupulong sa isla kung saan naging highlight ang pangangailangan ng Muslim-friendly spaces.

Aniya pa, bagama’t nakakapag-swimming ang mga Muslim sa mga pampublikong baybayin ay may iba pa ding mga Muslim ang mas piniling magkaroon ng private space.

Dahil dito, gagamitin ang isang bahagi ng northeastern Boracay Newcoast bilang private cove para sa mga babaeng Muslim kung saan dito din matatagpuan ang Savoy Hotel na kamakailan ay nakatanggap ng Halal kitchen certification.