“ENTITLED KA MASYADO, TEH” – OGIE DIAZ SA TRANSWOMAN NA TINAWAG NA ‘SIR’

Pinasaringan ni content creator at talent manager Ogie Diaz ang nag-viral na post tungkol sa ginawa ng isang miyembro ng LGBTQ sa isang waiter nang dahil lang tinawag itong “SIR”.

Ayon kay Diaz, nainsulto ang transgender na si Jude Bacalso dahil kahit naka-makeup at damit pambabae ay hindi pa rin ito mapagkakamalan na isang babae.

"Pinatayo mo for 2 hours yung waiter kasi nainsulto ka dahil tinawag kang “sir.”  Yan ang lumalabas sa mga posts. Nainsulto ka kasi, nakaayos-babae ka, pero hindi mo na-achieve na tawagin kang 'Ma’am'."

Tinawag din ni Diaz na “entitled” si Bacalso dahil tila ipinipilit nito sa iba ang kanyang kasarian.

"Nagdesisyon kang ibahin ang pagkatao mo, tapos ang gusto mo, mag-adjust lahat ang mga tao sa pagbabago mo ng anyo. Agad-agad? Di ba pwedeng dahan-dahan lang, Ateng? Tutal, ikaw naman ang nagdesisyong magbago ang takbo ng pagkatao mo? Entitled ka naman masyado, teh," anito.

Hindi rin nagustuhan ng content creator ang ginawang pagpaparusa ni Bacalso sa waiter.

Habang naniniwala naman ito na hindi ikararangal ng kanilang komunidad ang asal ni Bacalso.

"Nag-sorry na nga yung waiter, di pa rin sapat at pinatayo mo pa talaga nang dalawang oras?"

"Gusto mong maging proud ang LGBTQIA+ community sa yo, paano? Itsura mo lang ata nagbago, sana, idinamay mo na rin pati pagkatao mo para mabitbit mo kahit saan ka dumayo. 

Gusto mo pairalin ang gender sensitivity ng mga tao sa LGBTQIA+ community, pero hindi ka naman sensitive sa nararamdaman ng ibang tao".

Matatandaang, viral ang isang post ng nagngangalang John Calderon matapos nitong personal na masaksihan ang ginawa ni Jude Bacalso sa isang waiter na umano’y pinatayo ito ng halos dalawang oras matapos siyang tawagin na “SIR”.