3 NPA, PATAY SA ENGKWENTRO SA NEGROS OCCIDENTAL

 

Nasawi ang tatlong katao sa hanay ng New Peoples Army sa magkasunod na engkwentro ng mga militar at mga rebelde sa Sitio Mansulao, Brgy Pinapugasan, Escalante City, Negros Occidental nitong Miyerkules, February 21, 2024.

Ayon kay Lieutenant Colonel Arnel Calaoagan, Commanding Officer of 79IB, nangyari ang unang engkwentro bandang 11:10 ng umaga laban sa humigit-kumulang walong pinaniniwalaang natitirang miyembro ng nabuwag na Northern Negros Front (NNF-D). Ito’y matapos makatanggap ng impormasyon ang military ukol sa nangyayaring pangingikil, pambabanta at pwersahang pangongolekta ng rebeldeng grupo sa mga residente ng lugar.

Sinundan pa ito ng isa pang engkwentro dakong 2:17 ng hapon na tumagal ng limang minuto.

Narekober naman sa pinangyarihan ng bakbakan ang tatlong patay na katawan ng hindi pa nakikilalang CPP-NPA terrorists (CNT’s) kabilang na ang isang babae na iniwan ng mga kasamahan nito.

Maliban dito, nakuha din ng grupo ang ilang mga armas na kinabibilangan ng isang (1) AK47 rifle, isang (1) M653 rifle, isang (1) caliber .45, rifle grenades, anti-personnel mine, iba’t ibang cellphones, commercial radios, bandoliers, combat bag packs, at mga dokumento.

Samantala, kinumpirma ni Lt.Col. Calaoagan na apat sa grupo ng mga militar ang sugatan at kasalukuyang nagpapagaling.