DRAINAGE SYSTEM, SOLUSYON SA PROBLEMA SA SIRANG KALSADA SA BRGY. BACAN, BANGA –SP NERON

Binigyang diin ni Sangguniang Panlalawigan (SP) Member Nemesio Neron na ang paglalagay ng maayos na drainage system ang solusyon sa problema sa sira-sirang kalsada sa Brgy. Bacan, Banga, Aklan.

Ito ang inihayag ni SP Neron sa panayam ng Radyo Bandera Sweet FM Kalibo sa programang Sentensyador.

Aniya, dapat gawan ng maayos na kanal ang lugar dahil ito ay “water saturated” dahilan na madali itong masira.

Bukod dito, karamihan aniya sa mga dumadaan dito ay ang mga malalaking uri ng sasakyan ngunit hindi ito mapigilan dahil bahagi rin ito ng development ng probinsya.

Sinabi rin ng opisyal na posibleng mabawasan ang mga pagkasira nito sa susunod na taon.

Sa kabila nito, hiniling din ni Neron sa Department of Environment and Natural Resources (DENR) na kung pwedeng tanggalin ang mga punong kahoy sa lugar.

Paliwanag pa ng mambabatas, ang mga punong kahoy sa tabi ng daan ang umiipon ng tubig sa mga kalsada dahilan na nasisira ito kung kaya’t nararapat lamang na alisin ito.

Katunayan, ipinagbabawal aniya ang pagtanim ng mga puno sa tabi ng kalsada dahil maaaring makapinsala ito ng mga kabahayan sa panahon ng kalamidad.

Samantala, tinututukan na aniya ng Aklan Provincial Government ang naturang problema at hindi magtatagal ay masolusyunan din ito. | JURRY LIE VICENTE

 

(via Leonard Viray/Sentensyador)