COMELEC KALIBO, NAGPAALALA SA MGA IPINAGBABAWAL NA AKTIBIDAD MATAPOS MAGFILE NG COC

 

COMELEC KALIBO, NAGPAALALA SA MGA IPINAGBABAWAL NA AKTIBIDAD MATAPOS MAGFILE NG COC

Ni Jurry Lie Vicente

Binigyang diin ni Atty. Christian Itulid, Election Officer ng COMELEC-Kalibo ang mga ipinagbabawal na aktibidad pagkatapos magfile ng Certificate of Candidacy (COC).

Sa panayam ng Radyo Bandera Sweet FM Kalibo kay Atty. Itulid, inisa-isa nito ang mga Prohibited Acts pagkatapos mag-file ng COC ang isang kandidato.

Aniya, mahigpit na ipinagbabawal ang pagdala ng anumang uri ng armas o deadly weapon sa mga pampublikong lugar kahit na mayroong lisensya maliban na lamang kung otorisado ito ng Commission on Elections (COMELEC).

Paliwanag pa nito, para ma-authorize ng ahensya, dapat kumpleto ang papeles: may valid na lisensya at may aplikasyon sa Comelec para sa exemption ng Certificate of Authority.

Ipinagbabawal din aniya ang paglalaan ng pondo sa mga sayawan, lotteries at cockfighting.

Dagdag pa nito, bawal din ang pagsasagawa ng “vote buying” sa panahon ng eleksyon, gayundin ang pagbabanta at pananakot sa kahit sinomang election officials.

Igiinit pa ni Itulid na ipinagbabawal pa sa ngayon ang anumang uri ng aktibidad na may kaugnayan sa pangangampanya lalo na at wala pa ang campaign period.

Nagpaalala rin ito sa mga magr-release ng disbursement sa kada barangay na mag-apply kaagad ng exemption bago ang Setyembre 1 upang hindi maabutan ng banning.

Samantala, ipinagbabawal din ang anumang uri ng pangangampanya sa  panahon ng botohan habang ipapatupad din ang liquor ban sa kaparehong panahon. | (via Michael Selorio)