BANGKAY NA NAKITANG PALUTANG-LUTANG SA ISANG SAPA SA TORRALBA BANGA, NAKATAKDANG ISAILALIM SA AUTOPSY NGAYONG ARAW

 

BANGKAY NA NAKITANG PALUTANG-LUTANG SA ISANG SAPA SA TORRALBA BANGA, NAKATAKDANG ISAILALIM SA AUTOPSY NGAYONG ARAW

 

Ni Teresa Iguid

 

Nakatakdang isailalim sa autopsy ngayong araw ang nakitang bangkay ng isang babae kamakailan na palutang-lutang sa isang sapa sa Sitio Mangga, Barangay Torralba, Banga, Aklan.

 

Sa panayam ng Radyo Bandera News Team kay PCPT. Benny Jones Mendoza, ng Banga MPS, sinabi nito na layon ng isasagawang autopsy na matukoy kung ang biktimang si Rochelle Ann Rodriguez ay naging biktima ng panggagahasa.

 

Matatandaan na una nang naiulat na nawawala ang biktima matapos itong magpaalam na pupunta sa isang lamay ngunit hindi na ito nakauwi pa.

 

Matapos naman ang halos limang araw ay natagpuan na lamang itong nasa state of decomposition sa isang sapa sa nasabing bayan na nagtamo ng basag sa kanyang bungo at tadtad ng saksak ang iba’t-ibang bahagi ng katawan.

 

Sa ngayon ay patuloy pa rin ayon kay Mendoza ang kanilang pag-iimbestiga sa dalawang person of interest sa nangyaring krimen habang nakatakda din na sampahan ang mga ito nang kaukulang kaso sakaling mapatunayan na sila ang may kagagawan.

 

Samantala, ipinasiguro naman ni Mendoza ang kanilang pagsisikap upang mabigyang hustisya ang pagkamatay ni Rodriguez bago ito mailibing.