DEPED, NANINDIGAN SA DESISYONG PAGBAKLAS NG MGA DEKORASYON SA SILID-ARALAN

  

Nanindigan ang Department of Education (DepEd) na mas matututukan ng mga estudyante ang kanilang pag-aaral kung mababawasan ang “distractions” tulad ng posters at decorations sa mga silid-aralan. 

Dahil dito, inirekomenda ni DepEd Assistant Secretary Francis Cesar Bringas, na ang instructional o visual aids, na tipikal na naka-post sa classroom walls, ay maaaring gamitin na lamang ng mga guro sa oras ng kanilang pagtuturo. 

Mababatid na nakasaad sa DepEd Order 21, na pirmado ni Vice President at Education Secretary Sara Duterte na: “schools shall ensure that school grounds, classrooms and all its walls, and other school facilities are clean and free from unnecessary artwork, decorations, tarpaulin, and posters at all times.” 

Kabilang din ang oversized signages na may “commercial advertisements, words of sponsorships, and/or endorsement or announcements of any kind or nature” ay dapat na alisin o baklasin. 

Samantala, ipinunto din sa naturang kautusan na ang mga silid-aralan ay hindi dapat gamitin sa pag-iimbak ng mga materyales at dapat na walang iba pang hindi nagamit na mga bagay o bagay para itapon. |Ni Teresa Iguid